दाङको तुलसीपुरमा मोटरसाइकल अनियन्त्रित भएर पल्टिंदा ३ जना गम्भीर घाइते भएका छन् । बुधबार बेलुका साढे ६ बजेतिर तुलसीपुर १२ पुकार पसल नजिकै तुलसीपुरदेखि जसपुर तर्फ जाँदै गरेको रा ७ प ४०८ नम्बरको मोटरसाइकल अनियन्त्रित भएर पल्टिंदा ३ जना गम्भीर घाइते भएको इलाका प्रहरी कार्यालय तुलसीपुरले जानकारी दिएको छ ।
घाइते हुनेमा तुलसीपुर उपमहानगरपालिका १३ बखरीया निवासी २९ वर्षीय नुमलाल चौधरी, सोही ठाउँ निवासी २६ वर्षीय सेवक आचार्य र १९ वर्षीय झक्कु चौधरी रहेका छन् । उनीहरु तीनै जनाको राप्ती प्रादेशिक अस्पताल तुलसीपुरमा उपचार भैरहेको अस्पताललाई उद्धत गर्दै प्रहरीले बताएको छ । साथै उनीहरूले मापसे गरेर एउटै मोटरसाइकलमा तीन जना सवार रहेको पनि प्रहरीले जनाएको छ ।
प्रकाशित मिति : २०७९ माघ ११ गते बुधवार
