दाङमा मोटरसाइकल दुर्घटना हुँदा एक जनाको मृत्यु भएको छ, भने दुई जना घाईते भएका छन् । मृत्यु हुनेमा घोराही उपमहानगरपालिका १० जलौराका १८ वर्षीय सरोज चौधरी रहेको जिल्ला प्रहरी कार्यालय दाङले जनाएको छ । घाईते हुनेमा सोही ठाउँका करिब २३ वर्षीय ऋषिराज चौधरी र मोटरसाइकल चालक करिब १९ वर्षीय मङ्गल चौधरी रहेको प्रहरीले जनाएको छ ।
प्रहरीका अनुसार घोराही उपमहानगरपालिका ११ अबलडाँडाबाट नारायणपुर तर्फ ३ जना सवार रा ४ प ६०५१ नम्बरको मोटरसाइकल अनियन्त्रित भइ सडकदेखि करिब १५ मिटर खेतमा खसेर राति करिब साढे १२ बजेतिर दुर्घटना भएको थियो ।
दुर्घटनामा परि घाईते भएका सरोजको उपचारको क्रममा राप्ती स्वास्थ्य विज्ञान प्रतिष्ठान घोराहीमा बिहान करिब पौने २ बजे तिर मृत्यु भएको जिप्रका दाङले जनाएको छ । उनको टाउकोमा चोट लागेको थियो । घाईते ऋषिराजको टाउकोमा चोट लागेको र अवस्था गम्भिर भएको समेत प्रहरीले जनाएको छ । यस्तै अर्का घाईते चालक मङ्गलको हात खुट्टामा चोट लागेको र उनको अवस्था सामान्य रहेको र उनीहरु दुबै जनालाई थप उपचारको लागि भैरहवा रिफर गरेको प्रहरीको भनाइ छ ।
