सुर्खेतमा गाडी दुर्घटना हुँदा चार जनाको मृत्यु भएको छ भने एक जना घाइते भएका छन् । आज बिहान साढे २ बजे छिन्चुबाट वीरर्न्द्रनगरतर्फ जाँदै गरेको बा. प्र. ०१०२६ च ९२१३ नं. को डबल क्याप हाइलेक्स गाडी वीरेन्द्रनगर-११ झुप्राखोलास्थित रत्नराजमार्गमा दुर्घटना भएको हो ।
दुर्घटनामा परि गाडी चालक वीरेन्द्रनगर-७ का २७ वर्षीय सागर शाही, दैलेख डुङ्गेश्वर गाउँपालिका-५ का ३३ वर्षीय दीपेन्द्रजंग शाही, दैलेख भगवतीमाई गाउँपालिका-५ का ३१ वर्षीय बबिन शाही र दैलेख गुराँस गाउँपालिका-३ का ३६ वर्षीय राजेन्द्र बिसीको मृत्यु भएको जिल्ला प्रहरी कार्यालय सुर्खेतले जानकारी दिए । दुर्घटनापछि प्रहरीले उनीहरूलाई उद्धार गरी अस्पताल पुर्याइएको थियो ।
उनिहरुलाई अस्पतालमा पुर्याए लगत्तै तीन जनालाई चिकित्सकले मृत घोषणा गरेका थिए, भने एक जनाको उपचारका क्रममा मृत्यु भएको प्रहरीले बताएको छ । घाइते भएका दैलेख भैरवी गाउँपालिका-५ का वीरेन्द्रराज शाहीको उपचार भइरहेको छ । गाडीमा ५ जना सवार थिए, गाडी सडकबाट झन्डै ७०/८० मिटर तल खसेको छ ।
