काठमाडौ, २४ साउन । ‘प्रहरी हुँ’ भन्दै रकम असुली गरेको आरोपमा प्रहरीले रौटहटबाट एक युवकलाई पक्राउ गरेको छ । पक्राउ पर्नेमा रौतहटकै माधवपुर नगरपालिका- ९ का २४ वर्षीय रमेश साह छन् ।
साहले ‘म नेपाल प्रहरीको सादा पोसाकको प्रहरी हुँ’ भन्दै सर्वसाधारणसँग रकम असुल गर्न खोज्नुका साथै विभिन्न व्यक्तिको शरीर खानतलासी समेत गर्दै आएको अनुसन्धानको क्रममा खुलेको रौटहटकी प्रहरी प्रवक्ता डीएसपी एलिजा गिरीले जानकारी दिइन् ।
विशेष सूचनाको आधारमा खटिएको प्रहरीले साहलाई रौतहटकै चन्द्रपुर नगरपालिका- ९ डुमरियाबाट पक्राउ गरेको हो । उनको साथबाट सशस्त्र प्रहरीले लगाउने गरेको तयारी पोसाक पनि बरामद गरिएको प्रहरीले जनाएको छ । ‘उनलाई अभद्र व्यवहार मुद्दामा जिल्ला प्रशासन कार्यालय रौतहटबाट म्याद थप गरेर थप अनुसन्धान सुरु गरेका छौँ,’ डीएसपी गिरीले भनिन् ।
प्रकाशित मिति : २०८१ साउन २४ गते बिहिवार
